نادية صابر تكتب: سحر الليل

سكون الليل نايات تعزف 

ما يسمعها غير الأحباب 

تنسج للقلوب نغمه 

بتنشدها برنين خلاب 

نايات الليل بتندهلى 

وتهمسلى بصوت جذاب 

يا عيون الحور يا انسيه 

وجنيه مليحه الاهداب 

سمعت الصوت يكلمنى 

والصوره حواليا ضباب 

معقول؟!! الليل بيتكلم!!

الليل؟؟! ولا السحاب؟!

لاقيت عيونه بتميل على رمشى 

ومد الجفن بيسلم وواخدنى 

ببساط رمشه ع الريح بيحملنى 

عيون الليل سوادها يا عينى خوفنى 

عيون الليل كهوف قاسية بترعبنى 

يادوب نجومه ضياها بس طمنى 

نجوم الليل عرايس دايره ترقصلى 

تحيينى تغنيلى وتتمايل على قدى 

وسحر الليل بيحضنى يبوس خدى 

ومال بسحره وللرقص طلبنى 

فى لحظة لاقيتنى عروس الليل وأنا قلبى 

فى طريق الحب بين القلوب متهنى 

مع فارس عيونه سمارها دوبنى 

ورمش العين بيتخايل مع الننى 

يا سلطان الجن سلطان الحب اسرنى 

حبيب القلب ولو بالرمش يامرنى 

يخضع له القلب ولا غيره مالكنى 

يغيب عن عيني وفى الوجدان ساكنى 

فيا مولاي السلطان 

تفرشلى الأرض بالحنه 

تفتحلى أبواب الجنة 

لا سماك ولا أرضك تغوينى 

وكنوزك مافى يوم تغنينى 

ولا ملكك راح يحلى ف عينى 

ولا غيره حبيبى يهنينى 

ولا مال ولا سلطه تغرينى 

أنا عاشقة وحبى حامينى