17 نوفمبر 2026

اتلوا عليا ما تيسر من كلام العاشقين
ابعت قلوب
خلي الأنين بين ضلوع الصبر يهدى
يستكين
يمكن يتوب
رتل غناك واقرا تواشيحك هنا
مش عايزه صوفي في السحاب غايب هناك
يقولي الجنه في نهاية الطريق
مين عنده صبر للنهايه
والعمر في سباق الزمن
ابعت قلوب
الجنه في بداية الطريق
وسط الطريق
اخر الطريق
انا عايزه كل العمر جنه
رتل صيامك عن هوى آمنت مشاعره
بكل دقة حب في رسالة الوجود
بكل تسبيحة امان ليك في الوجود
جود ورتل ع المسامع
للي شايف ....والي سامع
كن
سبيل
تكية
جامع
درويش في حجر الغواني بيرتجل حكاياتنا قصة عاشقين
في حضن حضرة يدور يلف ينسجم فيه الحنين
رتل معايا ما تيسر بالحروف
لحد ما يجمعنا معنى يهدى شوقنا
ويستكين