سوزان حسين تكتب: كيف تتخطى الألم النفسي

النجاح في الحياة يتوقف علي قُدرة المرء علي التأقلم مع ألمه

الألم النفسي والجسدي هما إشارة ليك إن جسمك خلاص مابقاش متحمل

ومحتاج تاخد خطوة حقيقية تجاه نفسك إنك تتجاوز وتتعافى..

في رحلتك للتجاوز هنحتاج وقت...

وهتحتاج نجيب آخر كل حاجة...

آخر الحزن، آخر الألم، آخر جلد الذات، آخر أسئلة في الماضي و الإحتمالات وليه دا حصل وإيه كان ممكن يحصل ..

أكبر مشكلة بتواجه أي إنسان مرّ بتجربة قاسية، عرف خلالها الألم بشكله الحقيقي ووجهه شديد الشراسة،

إنه لما بيفوق، وبيحاول يتجاوز اللي مرّ بيه، بيظن إنه لازم يحاول يرجع لنفسه اللي كانت قبل ما يخوض التجربة، وده مستحيل للأسف..

التجارب الصعبة العظيمة بيكون ليها آثار إيجابية وسلبية عظيمة بردو على روح صاحبها..

الألم أفضل مُعلّم محاولة الهروب من إنك أتغيَّرت بالفعل بسبب التجربة الصعبة اللي خوضتها هي اللي بتزوّد سلبيات الألم وبتخفي إيجابيات التجربة عنك ..

الوعي بيخفف كتير من الألم ده...

إنك تفهم هو أنت ليه أتألمت قوي كدة أصلاً

الألم النفسي له أكتر من سبب

إن الروح بتحن والقلب متعلق بشخص

فغياب الشخص ده بسبب وفاة أو فقد علاقة بسبب مشكلة حصلت أساسه ده بيسبب ألم نفسي عظيم

الخذلان من أصعب اللحظات الي بتمر عليك لما بيجيلك ضربة من حد كان قريب منك وغالي عليك..

بيحصل حالة من عدم الإستيعاب وفقدان التوازن

أصل ده أكتر مكان مش بتلتفت تأمن نفسك منه لإنك متخيل إنه أمان..

الخذلان بيطفي الملامح وبيدخلك في دوامة من التساؤلات بتاكل في الروح أكتر مع الوقت

لما بتبدأ العلاقة بتوقعات عالية ده بيخليك يحصلك صدمة وحزن لما يحصل مشاكل والعيوب تبان بعد كده

إنك شايف نفسك من خلال الطرف التاني بتقيم محبتك لنفسك ورضاك عنها وثقتك فيها

بمحبة ورضا وقبول الطرف التاني

فلما يحصل مشاكل أو يبعد او يأذي بتتصدم بتتكسر بتفقد الثقة. في نفسك وفي الناس كلها

وأحيانا بتوصل لأنك تكون أنت المؤذي وتقول أتغدى بيهم قبل ما يتعشوا بيه..

العلاقات خاضعة لنظرية الزرع والحصاد

هي بذره بتسقيها وفي حوالين البذرة دي تخوفات

كتر تركيزك على التخوفات هيخليها تحصل وده كمان بيوصل الطرف التاني إنه يزهق ويبعد

الألم اللي حصل ممكن يكون مش مسؤوليتك وممكن تكون مشارك فيه بنسبة معينة لكن التعافي من الألم مسؤوليتك

علشان تعدي الفترة دي بسلام قدر الإمكان..

لازم تكون أكثر رحمة بقلبك و تسمح لنفسك تحس بكل مشاعرك

بلاش الإنكار أو رفض الألم..

الألم حصل بالفعل إنت بتتألم علشان أنت بشر أتعاملت بصدق وإحسان و أتخدعت أوأتخذلت..

ومهم كمان تكون واضح مع نفسك بلاش تعيش في الألم بشكل مُفرط وتتقمص دور الضحية

أسأل نفسك هل أنت فعلا عايز تتخطى الألم النفسي ده؟

لو إجابتك لا

يعني خلاص مستسلم للحالة دي وعايش فيها

ده بيكون سببه

خوف من الوحدة

فبتلاحق الشخص ده فبتخذل نفسك و بتكسر نفسك زيادة

وهو كل ما بتلاحقه بيبعد أكتر

شايف إنه مش هيتعوض وعايش على ذكراه

سايبها بظروفها لا عايز تطور من نفسك

ولا عايز تاخد أي خطوة ناحية التعافي

بتدخل في علاقات غير صحية علشان بتحاول تسد خانة الشخص اللي مش هيتعوض

وهتبقي بتوجع في الناس باللي إنت بتعاني منه

وهتبقي في علاقات كلها محسوبة عليك

علشان تتخطى الألم النفسي

أعمل عملية تنضيف

تنضيف لكل ما هو متعلق بيه ماتخليش حاجة حواليك بتفكرك بيه
(هدايا، صور..)

وعلي السوشيال ميديا مهم إنك تعمل بلوك وماتتابعش أخباره ولا تشوفه بيعمل إيه

تحذف أي حاجة كانت بتربطك بيه

(رقم تليفون، أكونت، أغنية) .

مواجهة الحقيقة

قيمة نفسك كنت بتاخدها من إيه؟!

هل قيمتك نابعة من إستحسان الناس أو من مكانتك في الشغل أو من فلوسك

لو قيمتك في أي حاجة من براك هتزول بزوال الحاجة دي أياً كان

لازم قيمتك تبقى نابعة من جواك

علشان اللي جواك هو اللي تقدر تُديره لكن اللي براك خارج نطاق سيطرتك

التعلق بالله وربط قيمتك الداخلية بعلاقتك بربنا بترفع من إحساسك بنفسك وقدرتك على إدارة نفسك

الإحسان والتراحم مع الناس

مش اللي هيكلمك تكلمه وتمشي بمبدأ التعامل بالمثل واللي مش هيسأل عليك مش هتسأل عليه

لو في ذنب معين حطله هدف وخطة تساعدك إنك تبطله

ولو في عيب أشتغل عليه وحسّن منه

أكتسب مهارة جديدة

التسامح وقبول إن البشر مش ملايكة

تقبل بشريتك وبشرية الطرف التاني وتسامح

سامح نفسك علي كل الغلط اللي عملته خلاص خلصنا..

وسامح الطرف التاني

التسامح بيطفي النار اللي جواك

لو مش قادر تسامح الشخص سامح إن التجربة دي حصلتلك

التعافي مش علشان ترجع تتعامل مع الشخصيات دي تاني

لا علشان تعيش في الدنيا دي خفيف..

العلاقة دي فصل في كتاب حياتك ماينفعش تفضل واقف عند الفصل ده وتقول خلاص خلصت الحدوتة

التقبل هو إدراكك إن الألم وارد وأنك زي ما أتاذيت من شخص كنت طرف مؤذي في حياة ناس تانية

وإنه أذى وحصل مش هتقف عنده

تقبل الخسارة وكون شجاع في تحمل مسؤولية أفعالك ومشاعرك...

عامل كما تُحب أن تعامل

لما تحترم بشريتك وبشرية الأخرين

وتتفهم إن الغلط وارد منه زي ما هو وارد منك..

تقبل ضعف الناس وهفواتهم وتغافل

علشان لما تغلط الناس كمان هتعذرك أو هتتقبلك بعيوبك

الألم كتير بيكون زي شرخ في الجدار حاجب عنك النور ولما تخرج منه وتتعافى هتحس إنه ميلاد جديد في رحلة حياتك
بعض الألم يُزهِر في نفس صاحبه، لو صدَّق فقط في إمكانية حدوث هذا.

إخصائية إجتماعية ونفسية وإرشاد أسري